مناجات

 

یارب قاپیوا دیده‌ی گریانیله گلدیم

نار غمه یاندیم دل سوزانیله گلدیم

 

هانسی قاپینی چالدیم اولوب خوار قیتدیم

نومید اولوب هربابیدن افغانیله گلدیم

 

بولدوم که هامی بنده‌لرین دعوت ایدوبسن

منده قوشولوب زمره‌ی پاکانیله گلدیم

 

سیلدیم اورک آئینه‌سینین گرد وملالین

درگاهیوه اخلاصیله،ایمانیله گلدیم

 

ای عیب لرین اوستونه پرده چکن آلله

آگاه‌سن اسراره نه عنوانیله گلدیم

 

نفسیم منی اغفال ائلدی چیخدیم اوزومدن

شرمنده‌یم قلبیم دولی القانیله گلدیم

 

گوز تیکمیشم اُول رحمتیوه من گونی قاره

عفو ایله منی قلب پریشانیله گلدیم

 

سرکش اولوب طغیان ائلدیم جهلیده یاندیم

دوتدوم رمضانی یوزه قرآنیله گلدیم

 

عمروم بویی دریای جهالتده چالشدیم

غرق اولدی گَمیم موجیلی طوفانیله گلدیم

 

ال آچمیشام درگاهیوه یاقاضی الحاجات

هرچند الیم بوشدی بونقصانیله گلدیم

 

خجلت تری آلنیمدا سرافکنده ونادم

یوخ عذر وبهانم دل ویرانیله گلدیم

 

یارب منیم افعالیملن ایلمه رفتار

رحمونله مدارا ائله پیمانیله گلدیم

 

دُوی صدقیله باب کرمی عرض ائله(راشد)

 مأیوس ائلمه الده‌کی امکانیله گلدیم

 

 راشد بیرامی سیس