احوالات عاشورا

 

چیخدی پیمبر روضه یِ رضواندان عاشورا گونی

گوردو کفن گیمیش حسین، پیکاندان عاشورا گونی

 

جنّاتید‌ن بیر حالیلن چیخدی، جنابِ مصطفیٰ

تاجِ رسالت باشدا یوخ، دورینده کلاً انبیاء

پایِ برهنه، سینه‌ چاک، ائتدی نزولِ کربلا

بلکه حسینین قورتارا، طوفاندان عاشورا گونی

 

گوردی لبِ گودالیده، زهرا یئره معجر سالیب

قاتل حسینین ذبح ائدیب، گول پیکرین بی‌سر سالیب

عرشه حسینیم وای سسین اوغلی ئولن مادر سالیب

زلفون ائدیب عنّابی رنگ، القاندان عاشورا گونی

 

بیر باخدی حسرتلن اونون، اعضایِ پیکان پوشینه

نیزه باشیندا نطقینه، یئرده تنِ خاموشینه

شوره گلیب پروانه تک، شمعین چکیب آغوشینه

گوردو اثر یوخ شعله‌یِ سوزاندان عاشورا گونی

 

ای مصطفیٰ‌نین گلشن و گلزارینه ریحان حسین

مُحکم ستونی دینیمین، شیرازه‌یِ قرآن حسین

دین اوسته وئردون جان حسین، جدّون سنه قربان حسین

دینی قوتاردون فتنه‌یِ سفیاندان عاشورا گونی

 

زینب ده اَندی تلّید‌ن مظلوم حسینین گورمگه

گورموشدی چوخدور یاره ‌سی تا گلدی درمان وئرمگه

ای کاش گلمیدی خانیم، محنت اودون سوندورمگه

باشسیز تاپیبدور قارداشین، میداندان عاشورا گونی

 

گوردی او نعشِ اطهری بی‌سر ییخیلمیش مَقتله

موج ایلیور دریا آخور، یول باغلی سو گلمز اله

چاره تاپوب تدبیریله، زینب بو امرِ مُشکله

سر وئردی آبِ دیده‌نی گریاندان عاشورا گونی

 

دیل بیلمیور سوز آنلاماز، وحشی عرب صحرانشین

چیپلاق آت اوسته اگلشوب، اللرده تیغِ آهنین

بیرده‌ن یئریند‌ن اوینادی، بیر عده ای دریا کیمین

خیمه سرایه یوز قویوب، هر یاندان عاشورا گونی

 

غارت قیلیب هر خیمه‌نی میخ و طنابین قیردیلار

آلِ رسولی جمع ائدیب، بیر خیمیه اود ووردورلار

باطنده عرشِ اعظمی، اهلِ جفا یاندیردیلار

چیخدی مدارِ چرخِ دون، میزاندان عاشورا گونی

 

پیمانگذارانِ الست ائتدی عمل بی‌کیف و کم

تا ساحتِ قُدّوسید‌ن فرمان اولوب صادر او دم

اهلِ وفانی آد به آد، ثبت ائتدی لوح اوسته قلم

صورت دوتوب یتمیش ایکی قرباندان، عاشورا گونی

 

خندق قازاندا حضرتِ سلمان او سیمایِ جلی

گوردی مبارک ریشینی توز توپراق آلتدا پرده‌لی

امّا مظاهر اوغلونون باتدی قانا آق ‌ساققالی

مظهر گورو‌ندی صورتِ سلماندان، عاشورا گونی

 

 مرحوم یحیوی اردبیلی

منبع مجموعه کانالهای مدح و مرثیه